መዘክር ወዲ ሃገረ-ሰብ

መዘክር ወዲ ሃገረ-ሰብ

" ንምዃኑ ብጋርን ጓልን ተመርዕያ ካብ ገዛኣ እትወጽእ ጓል ፡ ፍሉይ ክብሪ ከምዝወሃባ'ኸ ትፈልጥ'ዶ ፧ ብጋር ዝኣተወት ጓል፡ ኣይትህረምን'ያ። ብጋር ተመርዕያ እትወጽእ ጓል ብፍሉይ'ያ ካብ ቤት ኣቦኣ ትግዘም። ብዓል ቤታ ዘፈራ ምስ ዝቐርብ፡ ጭቃ ዓዲ ሒዙ'ዩ ዘንቀላውጦ። ምኽንያቱ ብሰንኪ መስዋእታ፡ ዓሰርተታት ሰባት'ዮም ድሒኖም ዘለዉ። ንሳ ጅግና'ያ። ንሳ መድሕን ኣሕዋታ'ያ። ንሕርያኣ ኣቃጺላ ብመንገዲ ትፈጥሮ ብርሃን ምስጢረ-ሰላም ትኸስት መልኣኽ'ያ። ኣብ መወዳእታ ድማ ንኽልተ ተጻረርቲ ዓሌታት ድንድል ኰይኖም 'ምእንቲ ደቂ ሓብተይ፡ ምእንቲ ደቂ ሓወይ' ብምባል፡ ልቢ ጽልኢ ናብ ፍቕሪን ስኽፍታን እትልውጥ መድሕን'ያ። እዚ ሕግታትናስ ሕጊ ለባማት ግን ድኻታት ዝውንንዎ ኰይኑ ሰማዒ ውሒድዎ ከይህሉ ምስትውዓል የድልየና'ዩ፡" ኢለ ክገንሖ'ውን ይዝከረኒ'ዩ። እዚ ክበሃል እንከሎ ግን፡ ሓደ ሕጊ ምስ ዝግስግስ ሕብረተ-ሰባዊ ዋሕዚ ንሱ'ውን ክውሕዝን ክህደስን ግድን ከም ዝኸውን ከይከሓድ'ዩ።
ሕጂ " ናትኩም ዘበለ ኲሉ ግደፍዎ፡ ኣይጠቅምን'ዩ፡ ኣይስልጡንን'ዩ፡" ከይብል ዝሓዝኩዎ መተካእታ የለን። እንተሃለወ'ውን ኣብ ኣእምሮ ብዓል ኣቦይ ምዝርኡ ቀሊል ኣይክኸውንን'ዩ። ናይ ምስዋጥ ምልክታት ዋላ እንተ ሃለወ፡ ዝወስዶ ግዜን ዋጋን'ውን ኣዝዩ ነዊሕን ዝተሓላለኸን'ዩ። እቲ ኣነ "ስልጡን'ዩ" ኢለ ኣብ ስነ-ልቦና ስድራይን ዓደይን ክዘርኦ ዝወናወን ዘለዂ ሓሳባት ከ ብሓቂ ድዩ ስልጡን፧ ብናኡ መን ኣገላልጽ'ዩ ኸ "ስልጡን" ዝብል ስያመ ዝወሃቦ ዘሎ፧