ኣይተመኽኒ

ኣይተመኽኒ!

መጀመርታ ብዛዕባ ደራሲ ገለ ክብል፡
ብራያን ትረይሲ ሓደ ካብቶም ብዓለም ደረጃ ዝፍለጡ ሓያላት መደርቲ እዩ። በቶም ኣብ ውልቃዊ ዕቤት ዝሕግዙ (self-help book) ዝጽሕፎም መጻሕፍቲ እውን ብዓለም ደረጃ ካብቶም ዝፍለጡን ልዑል መሸጣ ዘለዎን ጽሓፊ እዩ። ክሳብ ሕጂ ብራያን ንልዕሊ ሓሙሽተ ሚልዮን ዝኾኑ ሰባት ካብ ዝተፈላለየ ክፋል ዓለም ዝመጹ ብቐጥታ ኣስተንህሮ ክህብ ዝበቕዐ ሓያል መዳሪ እዩ። ልዕሊ ሰብዓ ሃገራት ክበጽሕ ዝበቕዐ ሓያል ኣነቓቓሒ እወን እዩ። ብራያን ኣብ ዓውድታት ቁጠባ፡ ፍልስፍና፡ ስነ-ልቦና ታሪኽን ንግድን ኣተኲሩ ንልዕሊ ሰላሳ ዓመታት ዘጽንዐ ዝጽሓፈ ዝመደረን እዩ። ኣብ ሃገርና ናቱ መጻሕፍቲ ካብ ዝተተርጎማ ኣነ ዝፈልጠን ጥራይ "ኣተኲሮ ዓወት፡ ናብ ሃብቲ ዘብጽሕ ስነ-ልቦና፡ 21 ግቡእ ኣጠቓቕማ ግዜ፡ ዝተቓላጠፈ ሜላታት ዕብየት" ካልእን ክንጠቕስ ንኽእል፡ ብራያን ኣብ መንእሰያት ዝገብሮ ወፍሪ ውጽኢቱ ንብዙሓት ህይወቶም ቀይርዎ እዩ።
ንኺድ እስከ ገለ ካብ ትሕዝቶ መጽሓፍ፡
ኣብ ምዕራፍ ሓደ ከምዚ ኢሉ ጀሚሩ ኣሎ
"ስለምንታይ እዮም ገለ ሰባት ኣብ ውልቃዊ ህይወቶምን ሞያኦምን ዝያዳ ካልኦት ሰባት ዕዉታት ዝኾኑ፧ እዚ ሕቶ እዚ ንዓመታት ዝኣክል ኣእምሮ ብዙሓት ፈላጣት ዝሓተተ ሕቶ እዩ ኮይኑ ጸኒሑ። ቅድሚ 2300 ዓመታት እቲ ህቡብ ግሪኻዊ ፍላስፋ ኣሪስቶትል "እቲ ዝዓበየን ናይ መወዳእታን ዕላማ ህይወት፡ ሕጉስ ምዃን እዩ፡" ኢሉ ነይሩ። ምስዚ ተኣሳሲሩ ዝስዕብ ዝዓበየ ሕቶ፡ "ንኽንሕጎስ እንታይ ዓይነት ሜላ ኣነባብራ ኢና ክንክተል ዘሎና፧" ዝብል እዩ።
ቀዳማይ ምዕራፍ ብኸመይ እናዓበኻ ትኸይድ ከምኡ ውን ብሉጽ ሰብ ንምዃን ርእሰ-ዲስፕሊን ብኸመይ ኣገባብ ከም እትጥቀመሉን ይምህረካ። ብተወሳኺ ብኸመይ ኣገባብ ርእሰ-ክብሪ፡ ርእሰ-ተኣማንነትን ርእሰ-ኩርዓትን ከም እንትሃንጽ ሓደ ብሓደ ይገልጸልካ። ኣብ ህይወት ክትረኽቦ እትደሊ ሓጎስ ብኸመይ ኣገባብ ከምትረኽቦ ብቅልል ዝበለ ኣገባብ ይትንትነልካ።
ናብ ምዕራፍ ክልተ ምስ ንሰግር፡ ኣብ ርእሰ-ዲስፕሊንን ባህርን ጸቒጡ እዩ ዝዛረብ። ኣብዛ መጽሓፍ መጀመርታ ንስኻ እንተተለዊጥካ ዝስዕብ ለውጥታት ባዕሎም እናፋሓኹ ክመጹ ምዃኖም እዩ ዘብርሃልካ።
"እዚ ሕጂ ዘለኻዮ፡ ውጽኢት ናይቶም ኣብ ምሉእ ህይወትካ ዝወሰድካዮም ውሳኔታትን ዝቐሰምካዮም ተመኩሮታትን እዩ። ኣብ ነፍሲ-ወከፍ ቅኑዕ ውሳነ ዝወሰድካሉን ብምሉእ ሓይልኻ ዝሰራሕካሉን ኣጋጣሚ፡ ነዚ ሕጂ ሃኒጽካዮ ዘለኻ ባህርኻ ኣብ ምህናጽ ዓቢ ተራ ከም ዝነበሮ ዘክር። በቲ ኣንጻራዊ ሸነኽ እንተ ጠሚትናዮ እውን ኣብ ተግባር ይሰርሕ እዩ። ኣብ ነፍሲ-ወከፍ ዝተማታእካሉን ውጽኢቱ ብዘየገድስ ዝመረጽካዮም ቀለልቲ መንገድታትን ኣብ ምሕማቕ ባህርኻ፡ ልዑል ተራ ከም ዝተጻወቱ ምግንዛቡ ዘጸግም ኣይኰነን።
ብራያን ንባህሪ ኣጣሚሩ ብዙሕ እኳ እንተበለ፡ ብመንገዲ ኤመርሰን ገይሩ ግን ሓደ ጥሙር ሓሳብ ገሊጹ ኣሎ። "ንሰላምካ ከም ሓደ ቅዱስ ወይ ክቡር ነገር ሓሲብካ ተኸናኸኖ። ኣብ መወዳእታ ካብ ሰላም ናይ ኣእምሮኻ ዝዓቢ ቁዱስ ነገር የሎን፡" ይብል። ሰላም ምህናጽ ሓደ ካብቲ ኣብ ህይወትካ ክህልወካ እትደልዮ ባህሪ እንተኾይኑ ኣተሃናንጻ ሰላም ኣብዛ መጽሓፍ ክትመሃሮ ትኽእል ኢኻ። በዓቢኡ ከኣ ሕማቕ ባህርያትካ ቀስ-ብቀስ ካብ ህይወትካ ክሃሱ ይኽእሉ እዮም።
ኣስዕብ ኣቢሉ ብዛዕባ ኣብ ገዛ-ርእስና ከምኡ ውን ትካልና ክህልወና ዝኽእል ሓላፍነት፡ ኣብ መሪሕነት ንጻወቶ ታራ የብርሃልና።
"ሓላፍነት ናይ ዘይምቕባል ባህርኻ፡ ናብ ብዙሓት ጸገማት ክመርሓካ ይኽእል እዩ። ገለ ካብኡ ብዛዕባ ሰባት፡ ትካላትን ካልኦትን ኣካላትን ዘለካ ዘይሕጉስ መረዳእታ፡ ቀስ ብቐስ በጨቕ ከተብሎ ኢኻ። ኣብ ገዛእ ርእስኻ ዘለካ መረዳእታ እውን ኣዝዩ ትሑት ክኸውን ክጅምር እዩ። እዚ ድማ ናብ መወዳእታ ዘይብሉ ምፍጣርካ ምኽንያታት ክወስደካ እዩ።" ኢሉ ይጅምር ኣብ ምዕራፍ ስለሰስተ።
እዛ መጽሓፍ ኣብ ነፍሲ-ወከፍ ምዕራፍ እተልዕሎ ኣርእስቲ መሳጢ እዩ እቲ ስዒቡ ዝመጽእ ኣርእስቲ ውን ከም ርእሰ-ዲስፕሊንን ዕላማን፡ ርእሰ-ዲስፕሊንን ብሉጽነትን፡ ርእሰ-ዲስፕሊንን ትብዓትን፡ ርእሰ-ድስፕሊንን ዘይምሕላልን፡ ርእሰ-ድስፕሊንን ስራሕን፡ ርእሰ-ድስፕሊንን መሪሕነትን፡ርእሰ-ዲስፕሊንን ንግድን፡ ርእሰ-ዲስፕሊንን መሸጣን፡ ርእሰ-ዲስፕሊንን ገንዘብን፡ ርእሰ-ዲስፕሊንን ምሕደራ ግዜን፡ ርእሰ-ዲስፕሊንን ምፍታሕ ብድሆታትን፡ ርእሰ-ዲስፕሊንን ሓጎስን፡ ርእሰ-ዲስፕሊንን ውልቃዊ ጥዕናን፡ ርእሰ-ድስፕሊንን ሓዳርን፡ ርእሰ-ዲስፕሊንን ቈልዑን፡ ርእሰ-ዲስፕሊንን ምሕዝነትን፡ ርእሰ-ዲስፕሊንን ሰላም ኣእምሮን" ኣጠቓሊላ ትርከብ። እዛ መጽሓፍ ንሓደ እኹል ሰብ ኣብ ህይወቱ መሰረታውያን ምንባር ከምኡ ውን ብኲሉ መዳያዊ ምንባር ዕብየት ንኽትጓናጸፍ ትሕግዝ መጽሓፍ እያ። ዝኾነ መንእሰይ እዚ ኣብዛ መጽሓፍ ተዘርዚሩ ዘሎ ክውንን እግባእ ምኽንያቱ፡ ጥዑይ መንእሰይ ጥዑይ ሕብረተሰብ እዩ ዝሃንጽ። እዚ ኣብዛ መጽሓፍ ዘሎ ሕጊ ናይ ህይወት እዩ። እዚ ሕጊ ተኸቲልካ ድማ ዝሓሸ መነባብሮ ትመርሕ። ስለዚ ሓንቲ ከም ኣብ ህይወትና ደገፍ ኮይና ክተገልግለና እትኽእል መጽሓፍ እያ።
ወድሓንኩም።